D’Union Grand-Duc Adolphe, an Zesummenaarbecht mat dem Piusverband an der INECC, organiséiert Sonndes, den 12. Dezember 2021, um 16.00 Auer zu Iechternach am Abteihaff e Chrëschtdagssangen. D’Manifestatioun ass op fir all Sängerinnen a Sänger an och de Publikum dierf a soll matsangen!

Um Programm vun dësem Concert, fir deen elo schonns bal 400 Sänger a Museker sech gemellt hunn, stinn traditionell Chrëschtlidder, déi een- oder zweestëmmeg gesonge ginn, mat Begleedung vun engem Orchester. Déi Interesséiert kënnen sech d'Noutematerial an d'Begleedung als MP3, fir sech mat den Arrangementer ze familiariséieren, op den Internetsitte vun Organisateure gratis eroflueden: www.ugda.lu, www. piusverband.lu oder www.inecc.lu ënnert dem Titel “Chrëschtdagssangen”. Déi meeschte Lidder goufe vum Rob Köller a Pascal Thiry speziell fir dës Geleeënheet nei arrangéiert, esou dass se fir Museke mat, oder ouni Chouer, gespillt kënne ginn. D'Noutematerial vun dësen Arrangementer kann all Musek bei der UGDA bestellen.

Dirigent vum Event ass de Nicolas Billaux, e jonke chargé de cours fir chant choral vun der UGDA-Musekschoul.

Matmaache bei dësem Chrëschtdagssangen, wat ënnert COVID-Check leeft, ka jiddereen dee Loscht huet. Einfach sech mat den Arrangementer familiariséieren an dann den Dag selwer op d’Plaz kommen.

D’Chrëschtdagssangë fënnt statt am Éierenhaff vun der Iechternacher Abtei, nieft der Basilika, Sonndes den 12. Dezember 2021. Rendez-vous ass um 16.00 Auer. De Concert gëtt gefilmt an duerno op Apart-TV an anere lokale Sendere gewisen.

Virdrun an duerno kann een da gären nach en Tour iwwert de Chrëschtmaart maachen, dee vun den Iechternacher Veräiner um Parking bei der Sauerbréck organiséiert gëtt, oder duerch d'Iechternacher Geschäfter, déi deen Dag all op hunn.

Dëse Concert steet ënnert dem Zeeche vum Undenken un de kierzlech verstuerwene President vum Piusverband, den Albert Brauch, deen sech zäitliewens fir de Gesang an alle Formen, a fir d’Zesummenaarbecht vun de Verbänn agesat huet.

Nouten an Text - MP3 (download)

• Am wäisse Wanterbësch (Winter Wonderland) - Nouten an Text - MP3
• Krëschtdag am Schnéi (White Christmas) - Nouten an Text - MP3
• Am Uewe potert d'Feier - Nouten an Text - MP3
• An der grousser hellger Nuecht - Nouten an Text - MP3
• Les anges dans nos campagnes - Nouten an Text - MP3
• O du Fröhliche - Nouten an Text - MP3
• Stille Nacht - Nouten an Text - MP3
• Süsser die Glocken - Nouten an Text - MP3
• E Wonnerstär - Nouten an Text - MP3
• Happy Christmas (War is over) - Nouten an Text - MP3 - Audio (John Lennon)
• Fröhliche Weihnacht überall - Nouten an Text - MP3
• Petit Papa Noël - Nouten an Text - MP3
• Feliz Navidad - Nouten an Text - MP3
• Marching Christmas - Nouten an Text - MP3